Galescola de Oia

O 23 de Abril foi o turno dunha das celebracións máis importantes do ano: o Día do Libro. Dende a Galescola de Oia pretendemos, diariamente, fomentar a lectura dos/as máis pequenos/as.

Ademais disto, hoxe concretamente realizamos un marcapáxinas aproveitando os centros de interese cos que estamos a traballar: a primavera e “os curros”.

Por último, os/as nenos/as aprenderon a utilidade do marcapáxinas que realizaron e o levaron para as súas casas.

 O 2 de abril celebrouse o día internacional do libro infantil conmemorando así o día do nacemento de Hans Christian Andersen, escritor danés famoso polos seus contos para nenos/as, entre eles “O parruliño feo”, “O soldadiño de chumbo” ou “As zapatillas vermellas”, entre outros.

 As/os nenas/os da Galescola de Oia fixeron a súa particular celebración, facendo diferentes actividades que xiraron en torno ao conto “O pequeno parrulo”.

Así, na aula de 2-3 contouse primeiro o relato e logo preparouse un decorado (as crianzas pintaron un estanque utilizando esponxas), para que, máis tarde, todas as educadoras do centro representaran o conto.

Para esta ocasión os/as nenos/as de 0-2 fixeron unha pequena excursión a aula de 2-3 para poder presenciar todos/as xuntos/as a representación levada a cabo polas educadoras.

Este conto narraba a historia dun parruliño que ía desexando partes do corpo de diferentes animais:

a cola dun esquío         a crista dun galo         a trompa dun elefante  

Cada un deles ían entregándolle ao parrulo aquelas partes do corpo que ía desexando. No momento no que o parrulo se quiso bañar no estanque cos seus amigos, deuse conta de que pesaba demasiado e desexou volver a ser de novo un parrulo.

Como podedes ver, os nenos e nenas non perderon detalle algún:

Xa por último, na aula de 0-2, unha vez de volta, cada neno/a pintou o seu propio parrulo para colocar nun estanque feito tamén por eles/as.

Con motivo da celebración do Día Mundial do Teatro, o 27 de marzo, na Galescola de Oia leváronse a cabo unha serie de actividades nas que as crianzas foron as principais protagonistas. Partindo do conto dos Tres porquiños os nenos e nenas:

• visionamos o conto no PC,

• confeccionamos as marionetas,

• elaboramos por recantos as tres casiñas con diferentes materiais,

• dialogamos sobre as normas de comportamento nos teatros

• e participamos no transcurso da obra no teatrillo da escola.

O primeiro día de primavera no hemisferio norte e primeiro día de outono no hemisferio sur, celébrase o Día Forestal Mundial. Dédicase a realzar a importancia das árbores e bosques de todo o planeta que, silenciosamente pero de maneira vital, contribúen co desenvolvemento de todas as especies, fundamentalmente do ser humano. Os bosques provennos de bens, producen osíxeno para que poidan respirar os seres vivos, nutren o chan, purifican o aire,… son decididamente vitales para todo o ecosistema do noso planeta.
Como na nosa galescola aínda non se pode plantar árbores, decidimos facer entre todos/as, a aula dos caracois xunto coa aula dos vermes, unha bonita árbore con materiais naturais. Os/as nenos/as apreciaron as texturas da codia e das follas e disfrutaron do traballo en grupo. A volta das vacacións plantaremos unhas semillas e estaremos moi atentos/as a súa evolución: regalas, poñelas ao sol, observar cando lle sae a primeira folla, canto medra, etc. 

 A Asemblea Xeral da ONU declarou o Ano 2008, Ano Internacional do Saneamento. Polo tanto, o Día Mundial da Auga 2008, que se celebrou este ano o xoves 20 de marzo, fixo énfasis nas cuestións relacionadas co saneamento.

Nós, dende a escola, queremos contribuír tamén a concienciar aos/ás nosos/as alumnos/as da importancia que ten coidar a auga. Falamos na asemblea da mellor maneira de conservala, dos seus diferentes estadíos, do seu sabor e cor e da súa utilidade (regar, beber, lavar, etc.).

O seguinte foi un traballo por recantos, onde os/as nenos/as experimentaron, manipularon e gozaron coa auga. Ao final dos obradoiros non tiramos a auga, botámola nos caldeiros da limpeza para utilizala para limpar o chan.

Nun recanto puxemos auga fría, morna e xeo; os/as nenos/as metían as súas mans e contábanos que sentían:

Noutro recanto probaron a facer burbullas:

Na mesa de auga investigamos con diferentes materiais e descubrimos que algúns flotan, como a esponxa e a madeira, e outros afúndense, como as pedras e a plastilina:

E gozamos dun conto interactivo sobre o ciclo da auga:

 O EXPERIMENTO

A auga é transparente pero nós podemos darlle cor. Neste caso con papel crespón de cor azul, os/as nenos/as quedaron abraiados/as vendo a trasformación que sufría a auga en canto lle botabamos os anacos de papel.

Do 13 ao 17 de Marzo celebrouse a Semana da Prensa na nosa escola. Aínda que estamos de cheo coa chegada da primavera fixemos un oco para organizar cos/coas nosos/as nenos/as actividades relacionadas coa prensa escrita. Marcámonos como obxectivos principais que as crianzas tivesen un primeiro contacto co xornal, que o manipulasen e que diferenciasen as distintas seccións que o conforman: noticias, anuncios, fotos,…

Tamén trouxeron da casa unha nova que comentamos entre todos/as na asemblea, fixemos un xornal xigante con todas as noticias recollidas e, por último, disfrutamos da historia duns/dunhas nenos/as que van mercar un xornal a un kiosco, contada polas educadoras e por eles/as mesmos/as no teatrillo da escola.

A madrugada do mércores 20 de febreiro entre as 4:00 e 5:00 horas tivo lugar un eclipse total de Lúa visible en toda Galicia. 

Un eclipse de Lúa ocorre cando a Terra se interpón entre o Sol e o noso satélite natural. Podemos distinguir tres etapas: penumbral, parcial e total. Ao longo das mesmas, a Lúa cambia a súa apariencia e a súa totalidade vólvese avermellada. 

Dende a escola intentamos traballar o eclipse, realizando unha serie de actividades:

• Na asemblea falamos sobre o Sol e a Lúa, o día e a noite e o eclipse lunar.
• Lemos o conto “Papá, por favor, achégame a Lúa”.
• Representamos un eclipse lunar. Fíxose de noite na aula, saiu a Lúa e volveuse vermella.
• Buscamos a noticia no xornal.
• Pintamos unha Lúa de dobre cara (branca e vermella) con material de refugallo.

Como podedes imaxinar a representación do eclipse foi a actividade estrela. A cara de asombro de todos/as os/as presentes compensa con creces todos os esforzos!

Todos xuntos festexamos o Entroido: fixemos murais, elaboramos os disfraces, degustamos productos típicos, decoramos caretas e antifaces e aprendimos esta canción.

                             Eu quérome disfrazar

                             collerei un gorriño

                             e serei un ananiño.

                             Eu quérome disfrazar

                             collerei un nariz

                             e serei o paiaso Pim.

                             Eu quérome disfrazar

                             collerei un sombrerete

                            e serei un moneco de neve.

   Elaborando o disfraz        Obradoiro do gusto         Disfrazándonos

Pintamos pombas        As nosas mans           Tiramos globos brancos

  Xogamos a roda                                    Fixemos un mural

TODOS E TODAS POLA PAZ

Nesta semana tan “carnavalera” na nosa escola e aínda que as nosas crianzas son moi cativiñas non nos imos esquecer de festexar todos xuntos o Día da Paz. Actividades que se reflexan na programación anual que están presentes ao longo do curso teñen mención especial nestes días.

                   “Non hai camiños para a PAZ; a PAZ é o camiño.”

                                            Mahatma Gandhi

Respetar os turnos na asemblea e fomentar os hábitos de cortesía na acción e na linguaxe, compartir xogos e xoguetes, regalarnos debuxos, apertas e bicos, observar imaxes e aprender a clasificalas en boas e malas accións é unha pequena mostra do que se pode facer dende a escola para fomentar actitudes de respeto e tolerancia que nos leven a un mundo en PAZ.

Achegándose o tempo de festexar o Nadal, queremos facilitarvos unha serie de propostas para desenvolver na escola coas vosas crianzas:

CONTOS DE NADAL

Os relatos e os contos son o fío conductor de moitas das actividades da escola e no Nadal tampouco poden faltar:

GUSTI e ALCÁNTARA, R.: Tento e mailo Nadal. Editorial Edelvives, 2001.

CARREIRO, P.: Os Bolechas festexan o Nadal. Editorial A Nosa Terra, Vigo, 2006.

ABRIL, P.: ¿Sodes vós os Reis Magos?. Editorial Galaxia, 1998.

QUESADA, M. e PEROZO, J. A.: Noite de Reis en Kalpankalá. Editorial Everest, 2006.

MELGAR, H. e CASALDERREY, F.: Derradeira carta ós Reis Magos. Editorial Xerais, 2002.

ANDERSEN, H. C.: A vendedora de mistos. Editorial Kalandraka, 1999.

GARDELLA, M. A.e POCH, J. A.: O cazador. Editorial Galaxia, 1992.

PANXOLIÑAS PARA ESCOITAR E CANTAR

Cancións de Nadal, de hoxe e de sempre, para acompañarnos na aula. Nestas páxinas atoparedes algunhas das máis representativas:

http://vello.vieiros.com/nadal2001/panxolinhas.html

http://especiais.vieiros.com/nadal2003/panxolinas.php

http://www.culturagalega.org/temadia.php?id=3835

http://vello.vieiros.com/nadal97/panxolinnas.html

http://www.geocities.com/lendas.geo/villancico/midis.htm

http://www.guiainfantil.com/servicios/musica/villan/indice.htm

ADORNOS DE NADAL

Estas son algunhas das nosas propostas, todas elas moi sinxelas de facer coas crianzas, para traballar o Nadal dende a escola.

Grilandas

Móbiles

Árbore de Nadal e Belén

Tarxetas

Adornos de parede

Mural